وطـــن عِـــزّة.. قصيدة جديدة للشاعر/ علي الطاهر الصديق
خلّي كل الدنيا تعرف
ما بنفرط فيك لحظة
مستحيل أرضك تهون
وتبقى نهب واستلاب
ونرضى ليك الذل ومُر
تستباح وتكون خراب
بنبقى ما ناسك أنحنا
وبتفقل بيناتنا باب
من رحيق نيلك روينا
وضقنا طعم الإلفة أحلى
عشنا فيك أيام حياتنا
كان تواصل واسمى رحلة
بنستمد رفعتنا منك
روحنا ترخص ليك ساهلة
ياتو ما عزاك وشالك
إنت في حدق العيون
وغنى ليك عازة في هواك
بي شجن ونغم حنون
بنفتديك بأغلى غالي
ويا نكون او لا نكون
نبع طيبة وفيك قيم
ما ندر تتلقي
شعب مخلص ليك ووطني
وكل دواخلو صفاء نقي
البفوتك يهوى غيرك خلي
ما محظوظ شقي
—————
*الشاعر علي الطاهر من مواليد الخرطوم القوز وله عدة تعمال مغناة ومسجلة بتلفزيون السودان وقناة النيل الأزرق وفضائية الخرطوم التي تغنى بها الفنانون إنصاف فتحي وسيد عوض وآخرون.. وهو عضو اتحاد شعراء الأغنية السودانية ودار الخرطوم جنوب.. كما له الكثير من المشاركات على المستوى العام ونال المركز الأول في مهرجانات عيد الجيش/ سلاح الكيمياء- يا وطن فارد جناحك اشعار الموسيقار الراحل سليمان عبد القادر.
وللشاعر علي الطاهر مشاركات في المنتديات ومهرجانات الأغنيةالوطنية ومسرح البقعة واحتفالات الشرطة والولايات المختلفة.
